domingo, 25 de agosto de 2019, 18:55

Un cura de Xermade (Lugo) invocará a deus para que mande un "arquitecto ou un aparellador" que arranxe unha estrada

|

O cura de Momán, no municipio lucense de Xermade, Luis Rodríguez Patiño, oficiará unha misa o vindeiro domingo, 18 de agosto, ás 12,00 horas, para "ver se invocando a deus, a ver se el ten algún arquitecto que o mande ou algún aparellador" que poida pór freo á deterioración que sofre a estrada provincial LU-P-2204.

"Eu teño esa fe en que dios poida mandar a alguén ou influír na cabeza de alguén", manifestou o cura, á vez que lamenta que a Deputación de Lugo, titular da vía, non cumpra as súas "promesas" e que dita estrada "que está orzada siga igual, segue bota un desastre", lamentou.

"Este domingo pasado indo a misa desde Moncelo a Momán os camións teñen que andar quilómetros e quilómetros para recoller leite e dan toda a volta polo alto de Xestoso para volver á estrada das Pontes", relata sobre as condicións da vía.

O párroco chegou a "falar" co presidente da Deputación da Coruña e alcalde das Pontes, Valentín González Formoso, para dicirlle que o tramo que depende da administración herculina parece "unha autoestrada" se se compara co ramal dependente da Deputación de Lugo que é "un desastre", insistiu.

"A que depende da Deputación da Coruña parece unha autovía e ves enfronte a de Lugo e é un desastre. ¿Que pasa que en Lugo, non pagamos os impostos igual?", engadiu.

Luis Rodríguez Patiño alerta de que moitos condutores se "xogan a vida", para justificar así que pretenda conxurar a situación cunha misa convocada para o domingo, no lugar de Camposa de Mazandoi.

USAR RECURSOS
"Eu teño que utilizar os meus recursos e como sacerdote teño que pedir á sociedade que se respecte a vida humana e aqueles que teñen o poder e que teñen que exercitar o ben público que o fagan dunha vez. Esta estrada parece un camiño de vacas", afea o sacerdote que non é a primeira vez que convoca aos seus fregueses para protestar polo estado desta estrada.

O cura de Momán chegou a suxerir que se "expropie" para mellorar as condicións da vía. "Non podes andar xogándote a vida, con fochancas e unha estrada estreita porque vén un camión e onde che metes?", incidiu.